Изге эштең иртәһе яҡшы

Рәсәйҙә 2018 йыл Ирекмән йылы тип иғлан ителде. Волонтерлыҡ хәрәкәте һәм изгелек ҡылыу төшөнсәләре бер-береһенә яҡын һәм бер-береһен тулыландыра ала. Ирекмәндәр төрлө форумдар, йыйындарҙа ғына ҡатнашып ҡалмай, ә хәйриә эшмәкәрлеген үҫтереүҙә ҙур көс һала.

Сибай ҡалаһының үҙәк китапханаһы Башҡорт дәүләт университетының Сибай институты янындағы «Изгелек» волонтерҙар ойошмаһы ( етәксеһе – Ишмуллина Г.И) менән берлектә Сибай халыҡты социаль хеҙмәтләндереү комплекслы үҙәгенең «Ышаныс» приютына ярҙам итеү маҡсатында «Балаларға шатлыҡ өләш» тигән хәйриә акцияһы ойошторҙо. Аҙна дауамында ярҙам итергә теләүселәрҙән балалар өсөн уйынсыҡтар, кейемдәр, китаптар, уҡыу кәрәк-яраҡтары һәм гигиена предметтары ҡабул ителде һәм йыйылған әйберҙәр приютҡа алып барып тапшырылды.

Китапханасылар һәм « Изгелек» волонтерҙар ойошмаһы студенттары ҡыҙыҡлы уйындарҙан, күңелле конкурстарҙан һәм дәртле концерт номерҙарынан торған байрам ойоштороп , балаларға тәмле күстәнәстәрен тапшырып уларҙың күңелдәрен күтәрҙе.

Үҙәк ҡала китапханаһы шәхси эшҡыуар Илшат Кәлимулла улына ярҙам йәһәтенән балалар өсөн тапшырған уйынсыҡтары өсөн һәм акцияла ҡатнашҡан һәр кемгә үҙенең оло рәхмәтен белдерә.